ULAŞ OĞLI SALUR QAZAN –
KDQ-nin baş qəhrəmanı. “Salur Qazanın
evi yağmalandığı boy” (II) Salur
Qazanın adı ilə bağlıdır. Salur Qazana
həsr olunmuş bu boy onu xarakterizə
edən bu sətirlərlə başlayır: “...Amit soyının
aslanı, Qaracuğın qaplanı, qonur
atın iyəsi, xan Uruzun ağası, Bayındır
xanın güyəgisi, Qalın Oğuzun dövləti,
qalmış yigit arxası Salur Qazan
yerindən durmışdı” (D-3512).
Oğuzun bütün dövlət işini Qazan
aparır. Qazan Oğuz üçün, xalq üçün doğrudan
da ümidgahdır, arxadır. O, öz
şəxsi mənafeyini güdmür, hər şeyi xalq
üçün edir. Oğuz məmləkətinə hardan
bir hücum, basqın təhlükəsi olsa, Qazanın
özünü ora yetirməsilə düşmən
məğlub olur.
Qazan öz müstəsna şücaəti ilə başqalarından
fərqlənir. O, son dərəcə böyük
bir qüvvətə, gücə malikdir, məğlubedilməz
surətdir. O, hansı cəbhəyə
gedirsə, zəfər qazanır. Düşmən onu ancaq
yeddi günlük yuxuya getdiyi zaman
tutub əsir aparır. Qazanın başçılığı altında
Oğuzda olan möhkəm intizam və
könüllü tabelik qaydasına görədir ki,
hamı Qazanın arxasınca birgə döyüşə
girir. Qazan varlığı ilə xalqa bağlıdır. O,
üç ildə bir dəfə özünün varidatını xalqa
paylayır. Yalnız arvadının əlindən tutub
evindən çıxır. Bu, Qazanın böyük humanizmindən
irəli gəlir.
Qazan həm də təmiz əxlaqlı, pak
ürəkli bir ərdir, ailə başçısıdır. O, öz
həyat yoldaşı, igid qadını Burla Xatuna
yüksək hörmət bəsləyir, ehtiram edir,
ağıllı məsləhətlərini dinləyib, əməl
edir.
|